Македонија

Иванов: Несериозно е прашањето за името да се решава телефонски

Иванов: Несериозно е прашањето за името да се решава телефонски

Претседателот Ѓорѓе Иванов, смета дека е несериозно и неодговорно прашањето за името, кое е исклучително важно прашање за граѓаните на Република Македонија, и наметнати технички барања, да се решаваат телефонски и по пат на личен договор меѓу премиерите на двете држави, се вели во соопштението од неговиот кабинет.

Кабинетот Иванов оценува дека вчерашната изјава на премиерот Зоран Заев во емисијата „Топ Тема“, дека евентуалното отфрлање на договорот со Грција ќе ги загрози перспективите на земјата за влез во ЕУ и НАТО и ќе ги зголеми внатрешните опасности, претставува очаен обид за манипулација на јавноста и наведување на македонските граѓани во пресрет на евентуално референдумско изјаснување, реагираат од кабинетот на Иванов.

„Стратешките определби на Република Македонија за членство во Европската Унија и во НАТО се јасно дефинирани и непроменети. Зачувувањето на уставното име и изнаоѓањето на решение кое нема да предизвика уставни промени, во никој случај не е насочено против интеграцијата на Република Македонија во Европската Унија и НАТО. Склучувањето на меѓународен договор содржан во еден или повеќе поврзани меѓусебни документи треба да биде во согласност со Уставот на Република Македонија, а не да предвидува негова измена“, пишува во соопштението.

Во врска со повикот на премиерот Заев за поддршка на евентуалниот договор од страна на сите политички чинители, Иванов укажува дека е потребен широк национален консензус за изнаоѓање решение кое нема да го наруши достоинството на македонскиот народ и граѓаните.