Најактивниот вулкан во Индонезија, Мерапи, утринава исфрли столб од пепел во висина од 5.000 метри и ова е втора по големина ерупција од почетокот на месецот.
Пепел и песок ја покрија областа одалечена неколку километри од врвот на кратерот кој се наоѓа недалеку од градот Јогјакарта. Властите не го подигнаа степенот на предупредување од вулканот Мерапи.
– Нема известување за штети од ерупцијата. Бараме луѓето да останат мирни и да не паничат, изјави Агус Вибово од Агенцијата за кризни ситуации.
За време на ерупцијата на вулканот на почетокот од месецов исфрлен е пепел во висина од околу 6.000 метри и Јогјакарта и соседниот град Соло беа прекриени со сива прашина, а беше затворен и аеродромот.
