Грчкиот остров Закинтос, ноќеска 30 минути по полноќ, го погоди силен земјотрес од 6.8 степени според рихтеровата скала. Земјотресот бил почувствуван и во југо-западниот дел од Македонија, во Албанија и во Италија.
Сеизмолошкиот центар во Грција соопшти дека е издадена тревога за цунами.
„Нивото на морето се менува и се формира цунами“, се наведува во пораката.
Епицентарот на земјотресот бил на 290 километри западно од Атина и на длабочина од 10 километри во Јонското море. На овој земјотрес претходеле и серија мали земјотреси, а мали земјотреси биле забележани и после големиот потрес.
Биле причинети помали материјални штети, распукала земјата на пристаништето во Закинтос, имало неколку одрони, а во маркетите биле регистрирани паднати производи на подот. Засега нема информации за повредени лица.
Грчката влада веднаш донесе одлука да бидат затворени училиштата поради земјотресот, а нема да работат и државните институции на овој остров.
