Група сметководители и овластени сметководители најавија организиран протест на 26 јануари, вторник, во 12 часот пред Владата. Тие бараат прием од претставници на Владата и од претставници од сите институции задолжени за измените согласно нивните барања. Тие денеска побараа да се пролонгираат роковите за поднесување годишна сметка.
– Барањето на сметководителите за пролонгирање на роковите за доставување на даночните и финансиските извештаи доставено до Влада на РСМ на ден 18 јануари е изгубено низ бирократските лавиринти, исто како и реалната потреба и предлози за нов Закон за вршење сметководствени работи изминативе три години – велат сметководителите.
Во земјава има 10.000 сметководители. Наметнатите кратки рокови и недоречености во законските решенија и нивната примена на среден рок ќе бидат причинско-последична врска за квалитетот на даночното, односно финансиското известување, кое што е сигнификантно за даночната и економската политика на државата, порачуваат тие.
