Да излеземе сите заедно и да го поразиме Заевизмот кој нè влече на дното, а Заевизмот не е само губење на националното достоинство туку и криминалот кој го прават на дневна основа, порача од битолската населба Јени маале Христијан Мицкоски, лидерот на ВМРО ДПМНЕ.
Според Мицкоски, нашата држава се наоѓа пред одлука каква Македонија сакаме и каква Македонија ќе ја оставиме на идните генерации.
Претседателските избори не се само обичен избор туку избор од кој зависи судбината на државата. А работите во реалноста не се добри и не се такви какви што ветуваа од власта.
Победа на претседателските избори ќе значи сигурни предвремени парламентарни избори на кој оваа власт ќе биде детронизирана. Да излеземе сите заедно и да го поразиме Заевизмот кој не влече на дното, а Заевизмот не е само губење на националното достоинство туку и криминалот кој го прават на дневна основа, рече Мицкоски.
Според лидерот на ВМРО ДПМНЕ не постои бизнисмен кој е задоволен од климата во која работи.
Нема бизнисмен кој е задоволен, ветуваа подобро здравство и повисоки плати а ни се случува егзодус на кадри кои си заминуваат од земјава. Ветуваа квалитет во образованието, а немаме универзитет, ниту во првите 1000 во Светот. Ветуваа правда и мир, а патриотите добија два века казна, додека терористи од ИСИС по шест години. Додека нема правда ќе нема мир. А нашата цел е да ја направиме државата подобра, и праведна, рече Мицкоски.
Мицкоски се сретна и со граѓани од битолско Оризари.
Жителите велат дека се игнорирани од локалната и централната власт. Има и незадоволни земјоделци кои тврдат дека ни им се исплаќа трудот кој го даваат, немаат пласман, а субвенциите каснат. Битола е запоставена, земјоделците игнорирани, а ветуваа живот, ветуваа правда, ниту правда има ниту живот дојде.
Единствено што добро оди во земјоделието се оранжериите и садниците со марихуана на власта и ништо повеќе.
Затоа ќе ги смениме работите, ќе донесеме правда, ќе се избориме за подобар живот за сите граѓани, порача Мицкоски од битолско Оризари.
