Додека новата лева коалициска Влада предводена од премиерот Педро Санчез влегува во Кабинетот, десетици илјади Шпанци излегоа на улиците стравувајќи од евентуалното „распаѓање“ на Шпанија.
Шпанците излегоа во координиран протест против Владата во која првпат се Унидас Подемос, единствената голема партија за поддршка на референдумот за независност на Каталонија.
Премиерот Санчез договори и преговори со Каталонската републиканска левица (ЕРЦ), најголемата партија за независност на Каталонија од каде најавија дека ќе се разговара за се, вклучително и „самоодредување“.
Демонстрантите најавуваат нови собири „за обединета Шпанија“.
Шпанија минатата недела ја доби својата прва коалициска влада по 80 години.
Шпанската социјалистичка работничка партија (ПСОЕ) и помалата левоориентирана Унидас Подемос му ги преставија на кралот Фелипе Шести своите министри откако добија тесно мнозинство во Парламентот минатата недела. За таа Влада гласаа 167 пратеници и 165 беа против неа, претежно од десницата.
Санчез, кој е на власт од јуни 2018 година, доби нов мандат откако 18 пратеници за независност на провинциите Каталонија и Баскија, беа воздржани. Тие не гласаа затоа што Санчез им вети разговори за иднината на Каталонија, провинција со население од 7,5 милиони луѓе.
