Реагирајќи на слабите успеси на германските ученици во меѓународното истражување ПИСА, германската министерка за образование, Ања Карличек (ЦДУ) апелираше да се воведат тестови на вештини за германски јазик и за деца од градинка, објави германски Велт.
– Она што ни треба е нова култура на читање и општа поддршка за учење јазик – смета Карличек.
Таа се залага дека треба да се тестира нивото на познавање на германскиот јазик кај децата од градинка за да може навреме да се преземат одредени мерки.
– Тие тестови потоа ќе се повторат со тргнувањето во училиште. На крајот, иако звучи старомодно, помага само: вежбање, вежбање и вежбање – изјави Карличек, која посочи дека 20 проценти од испитаниците од 15-годишна возраст не биле во состојба во целост да разберат прочитан текст.
Карличек додаде дека Германија не „тргнала толку лошо“ во анкетите за образованието спроведени од Организацијата за економска соработка и развој (ОЕЦД), но дека со оглед на улогата на Германија како водечка индустриска и иновативна моќ,мора да се подобри.
– Мораме да дојдеме до врвот – ако не на светско, тогаш на европско ниво – изјави демохристијанската политичарка.
Според резултатите од тестот за ПИСА, секој втор ученик во Германија чита „само ако треба“, а една третина сметаат дека читањето е бескорисно.
