Хафтар го одби руско-турскиот предлог за прекин на огнот во Либија

Либиската национална армија (ЛНА) на Калифа Хафтар ја поздрави иницијативата на Русија и Турција за примирје во Либија, но ќе ги продолжи борбите за Триполи, се наведува во изјавата на командата на ЛНА.

– Командата на ЛНА ја поздравува иницијативата на претседателот на Русија, Владимир Путин, претседател на пријателската руска држава, за воспоставување на мир и изјавува дека напорите на вооружените сили во војната против терористичките групи ќе продолжат, се наведува во соопштението.

Претседателите на Русија и Турција, Владимир Путин и Реџеп Таип Ердоган се договорија на 8-ми јануари околу заеднички став за Либија и ги повикаа страните да го прекинат огнот во недела на полноќ на 12 јануари и итно да седнат на преговарачка маса.

Владата во Триполи претходно побара воена помош од Турција, откако маршалот Калифа Хафтар започна да напредува кон либиската престолнина.

Соопштено е дека се работи за копнена, поморска и воздушна воена поддршка, како би се одбила офанзивата. Турскиот парламент на 2 јануари со мнозинство гласови го одобри испраќањето на турска војска во Либија. Поголемиот дел од арапските земји се противат на можната воена интервенција на Турција во либискиот судир.