По уривањето на надвозникот во Џенова, каде што загинаа најмалку 42 лица, српската влада нареди вонреден инспекциски надзор на сите мостови во Србија над 100 метри.
Министерката за градежништво, транспорт и инфраструктура, Зорана Михајловиќ, нареди вонредна контрола, се наведува во соопштението, а за проверка на теренот е задолжен експертскиот тим на ресорното министерство.
„Предмет на контрола и проверка ќе бидат мостовите на патиштата и пругите во Србија кои беа изградени пред неколку децении, а во меѓувреме беа санирани и реконструирани”, се вели во соопштението.
Покрај вообичаените редовни контроли на сите мостови на пругите, автопатите и регионалните патишта што ги вршат јавните претпријатија „Инфраструктура Железнице Србијe” и „Путеви Србије”, со наложениот вонреден инспекциски надзор дополнително ќе се контролира документацијата и конструкцијата на мостовите, се наведува во соопштението.
