Русија ја поддржува Србија и е подготвена да и ја обезбеди потребната помош за зачувување на нејзиниот суверенитет и територијален интегритет, изјави попладнево рускиот премиер Дмитриј Медведев, обраќајќи се пред членовите на српскиот Парламент.
Како што јави дописникот на МИА од Белград, Медведев истакна дека Русија се залага исклучиво за мирно решавање на постоечките проблеми, врз основа на Резолуцијата 1244 на ООН.
Тој изрази надеж дека Европска Унија нема да и забележи на Србија за потпишувањето на трговски договор со земјите од Евроазиската економска унија (ЕАЕУ).
Тој исто така, истакна дека ставот на ЕУ „или Исток или Запад“ не води во вистинската насока.
– Не треба да се оди на запад или на исток, туку да се размислува прагматично и да се развива прагматична соработка. Ние сме против конфликтен пристап – истакна Медведев.
Тој ја потенцира важноста за зачувување на националните интереси.
– Ние сакаме стабилен Балкан и соработка со сите земји на Балканот – наведе Медведев.
