Неформалниот работен појадок на шефовите на дипломатиите од ЕУ и од Македонија и Албанија, што по иницијатива на Грција се одржа во понеделникот во Брисел, според грчки дипломатски извори поминал во многу подобра клима од претходни неформални состаноци со европски министри во рамките на грчките напори да им се помогне на двете земји да добијат датум. Како потврда за такво нешто изворите го посочуваат фактот што на состанокот учествувале 20 министри.
Иницијативата на Грција е во рамките на грчката политика заснована на солунската агенда според која Атина цврсто ја поддржува европската перспектива на земјите од регионот.
Грчки дипломатски извори брифираат дека Атина ќе направи сѐ што може за да им помогне на двете земји, коментираат дека Грција сака на север да има стабилни соседи со европска иднина, а кога ќе созреат условите Македонија и Албанија може да бидат најдобри сојузници на Грција.
Истите извори, паралелно објаснуваат дека Грција е против раздвојување на кандидатурите, односно дека Македонија и Албанија треба заедно, во пакет, да добијат датум за почеток на пристапни преговори со унијата и истакнуваат дека пристапниот процес во ЕУ, паралелно е и процес на внатрешни реформи за самите земји.
