Двете специјални единици за справување со катастрофи на грчката противпожарна служба, кои се наоѓаат на две различни локации во Албанија, во текот на вчерашниот ден од урнатините спасиле 45-годишна жена и 24-годишен маж.
Како што соопштија од противпожарната служба на Грција, едната единица е во градот Тумана, околу 15 километри северозападно од Тирана, каде што од урнатините, била извлечена жива 45-годишната, но и една мртва жена.
Другата спасувачка единица е во Драч, кадешто жив бил извлечен 24-годишниот маж.
Од Противпожарната служба на Грција соопштуваат дека акцијата за спасување продолжува.
Грција вчера со авион C-130 на военото воздухопловство од Атина во Албанија испрати 27 лица од Специјалната единица за справување со катастрофи на грчката противпожарна служба, кои со две кучиња спасувачи и специјална опрема им помагаат на албанските власти, додека пак од градот Јанина заминаа 15 лица со специјални противпожарни возила.
