Mинистрите за надворешни работи на Грција и на Србија, Никос Дендиас и Ивица Дачиќ, на средба во грчкото МНР, разговарале за европската перспектива на земјите од регионот.
Шефот на грчката дипломатија, во писмената изјава по средбата, соопшти дека ја изразил поддршката за членството на Белград во Европската унија, како дел од политиката на Атина за целиот регион.
Цврста цел на грчката надворешна политика е интеграција на земјите од Западен Балкан во европското семејство. Членството во ЕУ ќе ги обезбеди потребните услови за создавање простор на мир, стабилност и безбедност, без надворешни интервенции кои функционираат дестабилизирачки за регионот. А Србија, има направено значајни чекори во насока на членството во ЕУ – вели Дендиас.
Во однос на дијалогот Белград – Приштина, шефот на грчката дипломатија повторил дека позицијата на Грција за статусот на Косово останува непроменета, „сѐ додека не се постигне конечен договор“, а со Дачиќ разговарале и за билатералните односи и за пандемијата.
I met with #Serbia DPM & FM I. Dacic at @GreeceMFA. Strengthening ???? cooperation on strong foundation of historic ties. pic.twitter.com/pRhm7DB427
— Nikos Dendias (@NikosDendias) June 12, 2020
Дендиас во писмената изјава вели дека на средбата со неговиот српски колега се осврнал и на случувањата во Источниот Медитеран, на однесувањето на Турција, а го споменал и договорот на Грција со Италија за разграничување на ексклузивната економска зона, потпишан во вторникот.
