Зошто Заев крие дека се среќавал со Дака кој му дал 300 илјади евра пред референдумот

Секојдневното „бомбардирање„ на јавноста со аудио и видео снимки од криминални активности и дејанија на власта, го доведе бившиот премиер и лидер на владејачкиот СДСМ, Зоран Заев, да се обидува невешто да ги избегнува суштинските одговори.

По последната „бомба“ од разговор меѓу Зоран Милески-Кичевскиот и српскиот бизнисмен Миодраг Давидовиќ-Дака во кој овој споменува дека дал 300.000 евра и 2.000 метри квадратни за, како што се покажа, деловна зделка со ШИК „Јелак“, Заев даде изјава во која, меѓу другото, рече дека опозицијата се обидува да го инволвира во криминал со разговори меѓу трети лица.

-Се обидуваат со разговори помеѓу трети лица да го инволвираат Заев. Заев работел чесно и поштено и покажал комплетна посветеност за својот народ и својата земја. Уште еднаш ќе испратам порака до сите дека сето ова што го правеше е конкретно и видливо, а сето она што го зборува опозицијата е „бла-бла“ и ништо повеќе. Требаше храброст за да падне режим 2015, видоја храброст. Требаше храброст да го обединиме нашето мултиетничко општество, еве им храброст. Требаше храброст да се решат споровите со Грција и Бугарија, покажавме храброст. Требаше храброст за членство во НАТО и почеток на преговори, требаше храброст. И додека сите овие прашања ги решававме, ја кренавме економијата, изјави тој.

Во снимката од разговорот, покрај Заев, се споменува и генералниот секретар на Владата, Драги Рашковски.

Но, обвинувањето на Заев на сметка на опозицијата за негово инволвирање во случајот не го амнестира од одговори на редица прашања. Прво, дали тој и генералниот секретар на Владата имале директна средба со бизнисминот Давидовиќ-Дака?  На чија иницијатива се одржала таа? Кога се одржала? Кога таа се одржала? Што била основната тема на разговор? Дали е точно дека услугата на ШИК „Јелак“ чинела 300.000 евра? Каде завршиле тие пари? Од кога тоа приватизација на фирма од типот на ШИК „Јелак“ се прави само со нотарски потпишана изјава? Зошто Заев избегнува да одговори дека имал средба со Дака?

Ова се прашањата на кои Заев и Рашковски должат одговори пред јавноста. А, тоа дека работел чесно или дека манифестирал „храброст“ му е само за по дома и за ефтин предизборен маркетинг.