Заев: Гоце Делчев е револуционер и за Бугарите и за Македонците, Југославија нѐ делеше

Премиерот Зоран Заев во интервју за бугарската агенција БГНЕС вели дека ние немаме споделена, туку заедничка историја. Според него Гоце Делчев е револуционер и за Бугарите и за Македонците, а во Југославија ја гледа како пречка за пријателството на овие два народи.

– Гоце Делчев е револуционер и за Бугарите и за Македонците, кој се борел за слободата на Македонија и Одринско. Наследивме време, кое не беше во полза на пријателството меѓу нас. Југославија нѐ делеше. Ако не ги признаеме слабостите на историјата, не можеме да градиме иднина. Треба да создадеме позитивна атмосфера меѓу младите луѓе за да го искористат тоа минато како отскочна штица за подобра иднина во периодот, што ни претстои, вели Заев.

Исто така тој ветува:

– Јас како премиер во името на целиот македонски народ ја преземам обврската, спроведувањето на Договорот да биде за пример. Во прв ред, зашто така ќе му служам најдобро на својот народ, но, се разбира, и на пријателска Бугарија. Лично јас ја потврдувам нашата позиција за целосно спротивставување на говорот на омраза, кој итно треба да биде прекинат.

Заев даде уверување дека активистот на ВМРО-ДПМНЕ, кој го запали бугарското знаме, ќе понесе одговорност.