ВМРО-ДПМНЕ: Заев преку Мијалков покажа дека постои мафија во државата

Циркусот кој што го приреди власта на Заев во содејство со правосудните органи под негова контрола, покажа уште еднаш дека во Македонија не владее правна држава, туку мафијата и криминалот, велат од ВМРО-ДПМНЕ, преку соопштение.

„Бегството на Мијалков и неговото враќање е само една обична театарска претстава која не поминува веќе ни кај членовите на СДСМ. Впрочем во која земја бегалец од правдата откако ќе биде вратен, завршува со домашен притвор и низа други екстра поволности. Целиот договор, заедно со анексите е разобличен од јавноста и сите знаат дека се работи за евтин пазар со правдата, нешто кое што Заев во континуитет го прави“, додаваат од партијата.

Резултатите од таквиот договор, велат, се наѕираат и јавноста ги претпоставува.

„Затоа е нервозата кај власта толку голема. Затоа се хаотични во своите постапки, па час распишуваат потерници, час се жалат на системот, час глумат одлучност, час симнуваат телесна температура, час зборуваат за координирани акции. Вистината е дека реакцијата на јавноста и други фактори влијаеа да се пишманат и да се предоговараат“, се навведува во партиското соопштение.

Според ВМРО-ДПМНЕ, Зоран Заев покажал дека е врвот на, како што велат, коруптивната и мафијашката пирамида во Македонија, а неговата единствена улога е да координира меѓу криминалните релации.

„Мафијата е таа шака луѓе кои ја ограбуваат државата, го осиромашуваат народот, а тие енормно се богатат. На ова се гледа крајот, а тоа ќе се оконча со крајот на власта на Заев“, смета ВМРО-ДПМНЕ.