ВМРО-ДПМНЕ: Мора да има одговорност од Заев и од Филипче за катастрофата која ја снајде Македонија

Додека министерот геноцид, Венко Филипче прави хумористични видеа Македонија има нов најцрн ден во епидемијата со корона вирусот. Бројот на заболени во последното деноноќие е 1.192 и на 22 починати лица, реагираат од ВМРО-ДПМНЕ, преку соопштение.

Филипче нема кого не обвини за својата неспособност, ама редно време е да собере храброст и да поднесе оставка. Неспособноста на власта да се справи со епидемијата граѓаните ја плаќаат со своето здравје и со своите животи. Премногу долго Филипче се справуваше со заразата само со гол ПР, со статистички прес конференции, со флоскули дека се е под контрола и заради тоа имаме катастрофална состојба. Вирусот се шири без контрола, никој не знае какви кластери има, граѓаните не можат да закажат тестирање, а за жал се повеќе луѓе не можат да си обезбедат здравствена заштита и нега, се вели во партиското соопштение.

Оттаму додаваат дека Филипче и Заев имаа девет месеци да се подготват за есенскиот бран, арно ама ништо не сработија. Наместо мерки, велат, тераа политика, наместо заштита на граѓаните тие водеа политички маркетинг.

Резултатот сега е држава која е црн рекордер во регионот и пошироко во Европа по број на заболени и смртност. Мора да има одговорност од Заев и од Филипче за катастрофата која ја снајде Македонија, велат од ВМРО-ДПМНЕ.