Кабинетот на претседателот Стево Пендаровски потврди дека шефот на државата утре во Вила Водно ќе биде домаќин на средба на лидерите на парламентарните политички партии СДСМ, ВМРО-ДПМНЕ, ДУИ, ДПА, Беса, Алтернатива и Алијанса за Албанците.
Претседателот Пендаровски свикува лидерска средба со една точка на дневниот ред – можност за одложување на парламентарните избори закажани на 12 април 2020.
Датумот за избори беше договорен од лидерите на партиите на средбата која Пендаровски ја организираше во октомври 2019 година по одржувањето на самитот на Европскиот совет.
Од Кабинетот на Пендаровски посочуваат дека на средбата ќе присуствуваат и претседателот на Собранието Талат Џафери и претседателот на Владата Оливер Спасовски.
Воедно и претседателот Пендаровски преку објава на „Твитер“ информираше за лидерската средба.
Лидерска средба утре во Вила Водно за можно одложување на парламентарните избори закажани за 12 април, датум договорен на средбата на парламентарните партии во октомври 2019. Ќе присуствуваат и претседателот на Собранието Талат Џафери и претседателот на Владата Оливер Спасовски.
— Stevo Pendarovski (@SPendarovski) March 16, 2020
