Специјалната обвинителка Катица Јанева денеска беше едногласно разрешена во македонското Собрание.
Претседателот на Собранието Талат Џафери ја отвори денешната седница со единствена точка: разрешување на специјалната обвинителка Катица Јанева, која што се наоѓа во притвор поради аферата „Рекет“.
Пратениците едногласно го усвоија дневниот ред.
За разрешувањето на Катица Јанева неколку пратеници зедоа збор.
– Секое правно лудило и правен занес завршува исто вака. – рече пратеникот од ВМРО-ДПМНЕ Илија Димовски и додаде дека секогаш кога се носат неуставни закон, секогаш кога се крши Уставот, работите завршуваат вака, а некогаш и со многу потешки последици.
Димовски исто така укажа на тоа дека во Грција започна процес против притисоците кон пратениците од опозицијата за прифаќање на Договорот од Преспа.
Збор зедоа и координаторите на СДСМ и ВМРО-ДПМНЕ, Јован Митревски и Никола Мицевски.
– Ставот на СДСМ е повеќе од јасен за разрешување на Јанева. На комисијата гласавме за нејзино разрешување, ќе гласаме и денес. Мора да нагласам како партија и пратеничка група сме одлучни и истрајни, правда мора да има за секој што се огрешил пред законот. – рече Митревски.
За збор се јави и пратеникот од ДУИ кој повика сите партии да го поддржат ветингот.
Со 102 гласа ЗА и ниту еден ПРОТИВ, Катица беше разрешена.
