Парламентот се распушти, избори на 12 април

Македонскиот парламент попладнево ја донесе одлуката за негово распуштање. За одлуката гласаа 108 пратеници, немаше против и воздржан. Парламентарните избори се закажани за 12 април.

Одлуката за самораспуштање беше поднесена од спикерот Талат Џафери, кој во своето обраќање рече дека по направената консултација на 10 февруари со Државната изборна комисија, денешниот ден е последен рок за распуштање на Парламентот.

– Одговорот од ДИК беше дека тие можат да обезбедат соодветен тек на процесот во рок од 55 дена од моментот на самораспуштање на Собранието поради фактот што предвремените избори се поврзани со чинот на распуштање на Собранието, а не со политички одлуки. И поради таа причина, анализирајќи и пресметувајќи ги сите рокови, последниот момент на распуштање на Собранието треба да биде денес со цел да се обезбедат сите рокови и постапки навремено, појасни Џафери.

Координаторот на СДСМ Јован Митревски рече дека во изминатите три години сегашниот парламентарен состав поминал низ многу премежија и пребродил многу кризи, но оти тоа не ги спречило да донесат историски значајни одлуки со кои се дефинира иднината на државата.

– На 12 април не очекуваат предвремени избори. Граѓаните ќе имаат можност да одлучат кому ќе му ја дадат поддршката. Ќе се соочат со две дијаметрално спротивни политики – едната на СДСМ чија главна грижа е граѓанинот и другиот избор за кој нема да коментирам, рече Митревски, посочувајќи ги придобивките за граѓаните од реализацијата на проектите спроведени од СДСМ.

Координаторот на ВМРО-ДПМНЕ Никола Мицевски оцени дека во изминатите три ипол години овој парламентарен состав поминал низ тешка политичка криза и обвини за непрофесионално работење и криминал и корупација во редовите на СДСМ.

– Избори мора и ќе има на 12 април. Денес ќе ставиме крај на заложништвото во кое се наоѓа државата, рече Мицевски, посочувајќи дека СДСМ ќе остане запаметена по, како што рече, катастрофалните економски политики, партиските вработувања во администрацијата, немањето странски инвестиции.

Собранието денеска претходно ги донесе двотретинските Закони за ЈО и одбрана, а беа донесени и неколку закони по скратена постапка, со што се создаде услов за распуштање на овој парламентарен состав, деветти по ред.

Пред почетокот на расправата за распуштање, беа донесени Законот за заштита на личните податоци, измените на Законот за аудио и аудиовизуелни медиусмки услуги, измените на Законот за Инспекторат за употреба на јазиците и Законот за управување со движењето на предметите во судовите, како и измените на Законот за урбано зеленило.

Собранието претпладнево ги донесе и Законот за ЈО, Законот за совет на јавни обвинители и Заканот за одбрана. При донесувањето на законите за изменување на законите за Совет на јавни обвинители и за одбрана, пратениците од ВМРО-ДПМНЕ не беа присутни.