Николоски по средбата со Пленковиќ: Соработката помеѓу двете држави треба да се интензивира

Претседателот на ВМРО-ДПМНЕ, Христијан Мицкоски и потпретседателот на партијата Александар Николоски, денеска во Загреб имаа средба со премиерот на Република Хрватска Андреј Пленковиќ и министерот за надворешни и европски прашања на Хрватска, Гордан Грлиќ Радман.

На оваа средба претставниците од ВМРО-ДПМНЕ побараа поддршка од Пленковиќ, а свој статус околу средбата напиша и потпретседателот на партијата, Александар Николоски.

– Во рамки на денешната посета на Хрватска остваривме средба со Премиерот на Хрватска, г. Андреј Пленковиќ. Премиерот на Хрватска Пленковиќ е долгогодишен пријател на Република Македонија, а двете сестрински партии ВМРО-ДПМНЕ и хрватска ХДЗ имаат силна соработка во рамки на ЕПП.
На средбата со хрватскиот премиер разговаравме за сите актуелни случувања во Македонија, катастрофалното менаџирање со корона кризата и економската криза како последица на здравствената криза. Македонија се наоѓа во ќорсокак на патот кон ЕУ, економијата тоне, а корупцијата цвета во државава.
Заеднички заклучивме дека соработката помеѓу двете држави треба да се интензивира на повеќе полиња, посебно во делот на размена на искуства, знаење и економија, напиша Николоски на неговиот Фејсбук профил.