Претседателот на ВМРО-ДПМНЕ, Христијан Мицкоски по вчерашната средба со Претседателот на комитетот за надворешни работи на Парламентот на Унгарија, Золт Немет и пратеникот на Фидес, Габор Домос ги пренесе впечатоците до македонските граѓани.
Од неговиот краток престој во Унгарија, вели можел да види дека главниот предизвик на младите е како да ги усовршат системите за вештачка интелигенција и нивната примена во секојдневниот живот.
„Оваа 2021 година очекуваат економски бум, поголем од сите години претходно. Се зборува за новиот пакет од 5.18 милијарди долари евтини кредити кои ќе бидат на располагање на домашните бизниси како директна помош за економијата. Годината што измина економијата растеше со 4.9%, додека нашата е во рецесија“, појаснува Мицкоски поработниот ручек во Будимпешта.
На денешната агенда на Мицкоски за доцна попладне преедвидена е средба со премиерот на Словенија, Јанез Јанша.
„Земјата оваа година се подготвува за овогодинешното претседателство на ЕУ. Дискусиите се за водењето на зелените политики. Во здравството, Владата на Словенија очекува до почеток на летото 70 проценти од вкупното население да биде вакцинирано против ковид вирусот. Словенија нарача 3.227.948 дози на вакцини“, потенцира Мицкоски.
Тој додава дека светот оди напред со големи чекори, а кај нас главно е тоа што нема вакцини, освен оние кои се добиени како донација, што е премала количина за вистинските потреби.
„На пациентка ѝ се извадени човечки органи, а сѐ уште не станува збор за одговорност на било кој. Полицијата ги казнува оние што чествуваат Водици, а ги остава вистинските криминалци да дивеат по улиците. Важно, најавен е нов петти пакет на мерки, откако претходните четири немаа никаков реален ефект во економијата, освен намената поради која е и овој нов пакет, а тоа е поткупот. Заглавени помеѓу тендерите на власта за приватни џебови, мафијашкиот попис и продажбата на идентитетот, додека земјава стои во слепите сокачиња на патот кон ЕУ, граѓаните губат уште една важна година од своите животи во чекање додека светот оди напред“, потсетува Мицкоски кој вели дека мора да се стави крај на политичарите криминалци и на неспособноста.
Тој порача дека иднината е наша и ќе се бориме за неа! За овие и сите идни генерации.
