Претседателот на ВМРО-ДПМНЕ, Христијан Мицкоски, при посетата на Дојран истакна дека реалноста во којашто сега живеат граѓаните е тешка, мачна, а државата се наоѓа во политичко мочуриште кое изобилува со многу неправда и понижување.
Како што порача Мицкоски, затоа овие избори не се обични и на овие избори граѓаните избираат во каква Македонија сакаат да живеат.
Ова е тој момент, ова е таа раскрсница во која што ние треба да го избереме вистинскиот пат. Дали ќе зборуваме за политичари кои што се присутни на политичката сцена уште во времето на транзицијата, истрошени, потрошени кои што буквално немаат што да понудат. Или политичари кои имаат визија, стратегија, план како да се справат со предизвиците кои што ни се испречени на патот. Дали ќе зборуваме за држава во која што срамот, понижувањето и предавствата ќе царуваат, или држава каде што гордоста, чесноста и честитоста ќе бидат основна вредност. Држава во која што ќе гледаме луѓе кои што партнери и коалиција со криминалците и корупцијата, или држава каде што ќе имаме бескомпромисна борба против криминалот и корупцијата. Држава каде што неправдата и свитканата кичма ќе бидат наше секојдневие или држава во која што правдината и исправената глава ќе бидат наша реалност – нагласи Мицкоски.
Тој истакна дека уште од првиот собир е убеден дека кај секој граѓанин полека се буди идејата за обединување околу обновата која ќе победи на 15. јули.
Матрицата на СДСМ почнува со предизборна измама и претпоставувам ќе дојдат овде, раката на срце, главата надесно и ќе каже за жицата, за семето, за времето и сето тоа по ред. Ама додека тоа го зборува, ќе ви каже десетина лаги кои што мисли и убеден е дека вие ќе поверувате. Отприлика тоа е првиот чекор од таа нивна матрица лага предизборна. Доколку им пројде таа лага и добијат каква таква поддршка од граѓаните тогаш следи вториот чекор. А, вториот чекор е национално предавство и срам. Потоа следи третиот чекор пљачка, криминал и корупција. И сосема на крај откако ќе го заробат обвинителството и судството тоа истото ќе им служи за пресметка со политичките противници и од друга страна ќе им служи да се амнестираат за минатите неправди од претходните влади – истакна Мицкоски.
Лидерот на ВМРО-ДПМНЕ додаде дека Заев за да дојде на власт како влог ја става Македонија, говори за нејзина федерализација.
Јас ви ветувам дека никој повеќе после 15. јули нема да владее со овој народ. Туку ќе работи заедно со народот и во интерес на народот. Доста беше од политичари или министри кои што одлучуваат во канцеларии. Нас ни се потребни современи европски, народни политичари кои што заедно со народот ќе ги креираат проектите за иднината на сопствената земја. Нема повеќе власт каде што тоа го прави ова раководство предводено од СДСМ и Зоран Заев. Нема повеќе шефови на партии, туку има политичари кои што заедно со народот ќе работат во интерес на народот – порача Мицкоски.
На крајот од средбата со граѓаните од Дојран, Мицкоски вети дека по 15. јули кога ВМРО-ДПМНЕ ќе дојде на власт доаѓа и правдата. Во име на правдата сите кои се огрешиле пред законот ќе одговараат.
