Со цел да им помогне на здравствените работници во справувањето со кризата предизвикана од корона вирусот, Комерцијална банка АД Скопје обезбеди парична донација во износ од 6.150.000 денари и дополнителна заштитна опрема (34.250 медицински заштитни маски за лице) во вредност од 1.200.000 денари за потребите на Министерството за здравство, соопштија од банката.
– Паричните средства се префрлени на посебна наменска сметка на Министерството за здравство, а се наменети за справување со заканата по јавното здравје произлезена од епидемијата со вирусот Ковид-19. Доставени се и медицинските маски за заштита на здравјето на здравствените работници, кои во борбата за зачувување на јавното здравје се најизложени на ризикот од корона вирусот – се наведува во соопштението.
Од банката потенцираат дека борбата со корона вирусот е заедничка обврска и предизвик против кој ќе треба да се спротивставиме со сите сили и капацитети.
– Комерцијална банка, како докажана општествено одговорна компанија, од самиот почеток на актуелната криза презема соодветни мерки и активности, пред се, за заштита на здравјето на клиентите и на вработените, а и за несебична поддршка на здравствените институции кои ја водат најтешката борба. Само со лична и корпоративна одговорност на ниво на цела држава ќе успееме да се справиме со заканата што ја наметна корона вирусот – порачуваат од Комерцијална банка.
