Малку е веројатно решението за проблемот околу името да се најде во тековните разговори меѓу Атина и Скопје, рече денеска лидерот на помалиот коалициски партнер во грчката влада, пренесува „екатимерини.“
Говорејќи за грчкото радио „Алфа“, шефот на Независни Грци и министер за одбрана, Панос Каменос, оцени дека „разговорите со посредство на Обединетите нации неизбежно ќе стигнат до ќор-сокак“, бидејќи, како што вели тој, инсистирањето на Грција, Македонија да го смени својот Устав, за отстранување на одредени клаузули, никогаш нема да помине низ парламентот во Скопје и можело да предизвика предвремени избори во земјата.
Каменос, додаде дека неговиот дел од десничарските националисти “никогаш нема да гласаат за име што го содржи терминот “Македонија”, без разлика во кој контекст “.
Неговата изјава фрла песимизам за тековната фаза на разговорите.
Иако Каменос за време на преговорите меѓу Заев и Ципрас се дистанцираше од коментари, велејќи дека неговата партија нема да стори ништо што би го загрозило текот на преговорите, предлогот „Република Илинденска Македонија“ беше одбиен од сите главни опозициски партии во Грција.
