Јанушев: Велешани знаат дека здравиот пат по кој ги води СДСМ воопшто не е прав

Генералниот секретар на ВМРО-ДПМНЕ, Игор Јанушев, денеска од платото пред театарот во Велес истакна дека граѓаните се заинтересирани да изнесат дел од проблемите од актуелната власт која, според него, на некој начин ги изманипулирала велешани и не им ги решила ветените проекти како што е затворениот пазар, обиколница околу градот, затворен базен и другите.

Јанушев посочи дека она што го гледаме на државно ниво, така е и во градот Велес каде се укинати сите театарски и други манифестации, а културата и спортот буквално, како што рече, тонат.

– Велешани тоа го имаат согладано и знаат дека здравиот пат по кој ги води СДСМ воопшто не е прав туку тотално погрешен. Затоа тука од Велес ќе кажеме дека Македонија се обновува и за неколку месеци дефинитивно ќе ги испратиме во политичката историја, порача Јанушев.

Генералниот секретар на најголемата опозициска партија информира дека преку Разговорите за обнова на Македонија досега имаат остварено разговори со околу 50 илјади граѓани кои им ги имаат кажано своите проблеми.

-Ние како партија земавме обврска да понудиме решенија во изборната програма за изборите кои ќе се одржат на 12 април. Одзивот на нашиот повик од страна на граѓаните е одличен. Поради големиот интерес ја проширивме акцијата, а воедно се отворени и штабовите на ВМРО-ДПМНЕ во сите градови, а и преку викендите, остваруваме и контакти и со месните, односно урбаните заедници, информира Јанушев.

Тој појасни дека пред две недели упатиле јавен повик до сите здруженија на граѓани, невладини организации, синдикати, стопански и останати комори да земат учество во изработката на програмата на партијата.