Министерот за надворешни работи на Република Македонија, Никола Димитров, денес, во Скопје, имаше средба со министерот за надворешни работи на Сојузна Република Германија, Хајко Мас, кој e во дводневна официјална посета на земјава.
Како што информираат од МНР, Димитров го брифирал својот германски колега за актуелните внатрешнополитички состојби, текот на домашните реформи и за надворешнополитичките приоритети на Република Македонија, со акцент на актуелностите поврзани со спроведувањето на претстојниот референдум.
Германскиот шеф на дипломатијата упатил јасна порака на поддршка и охрабрување до македонската Влада да продолжи со имплементација на внатрешните реформи, со фокус на значењето од спроведување успешен референдум и целосна имплементација на договорот со Грција како клучен чекор за отворање на европската перспектива и целосна интеграција на Република Македонија во ЕУ и НАТО.
Соговорниците размениле и мислења за можностите и заемниот интерес за натамошниот развој на севкупната билатерална соработка меѓу Република Македонија и СР Германија. Притоа посебен акцент бил ставен на потенцијалот за натамошно унапредување на економската соработка и продолжување на континуитетот на најголемата вкупна трговска размена на Македонија со Германија.
