Три земји, Франција, Германија и Италија се противат Македонија и Албанија да бидат раздвоени и да се почнат преговори прво со Македонија.
Франција се противи поради тоа што не сака никакво ново проширување пред да се реформира преговарачкиот процес, додека Германија и Италија стравуваат дека доколку преговорите започнат само со Македонија, Албанија „вечно“ ќе остане во чекалницата на ЕУ, велат за МИА дипломати од земја членка на ЕУ.
Според нив, Холандија не се противи на раздвојувањето од Албанија, бидејќи Хаг мора да ја следи одлуката на холандскиот Парламент кој смета дека Скопје е подготвено за преговори, а Тирана не.
Останува дека Холандија сака да го услови отворањето на преговорите со носењето на законот за јавно обвинителство, како што најави шефот на холандската дипломатија Стеф Блок, пред почетокот на министерскиот состанок.
Доколку се дојде до договор за отпочнување на преговорите со Македонија, Хаг би барал првата меѓувладина конференција да се одржи само откако ќе биде задоволено барањето за независно јавно обвинителство.
Дипломатите во Луксембург објаснуваат дека дури и да се постигне компромис за евентуално раздвојување на двете земји, многу се мали шансите тоа да биде сторено денеска, бидејќи француската државна секретарка нема мандат да носи таква одлука. Неа може да ја донесе само францускиот претседател Емануел Макрон на Самитот на ЕУ в четврток и петок во Брисел.
