Министерот за здравство Венко Филипче кажа дека по анализите ќе набават маски за ризична група на граѓани со цел да се заштитат од загадувањето на воздухот.
– Разгледуваме алтернатива и собираме податоци за тоа која ризична група граѓани може дополнително да се заштити од аерозагадувањето со специјални маски и кога ќе ја имаме таа бројка ќе видиме на кој начин ќе може да ги набавиме и да им ги поделиме. – истакна Филипче, одговарајќи на новинарско прашање за тоа дали има дополнителни мерки за превенција на здравјето на граѓаните.
Тој изрази надеж дека за кратко време ќе заврши анализата, која произлегува од податоците од системот „МојТермин“, врз основа на податоците од матичните лекари.
