Министерот за внатрешни работи, Наќе Чулев на фејсбук профилот прикажа статистика за вкупниот број преземени мерки за време на викендот.
Полициските службеници се во првите редови во справување со пандемијата од Covid19 и тие во континуитет преземаат мерки за контрола на почитување на одлуките на владата. Во продолжение е претставена статистиката за вкупниот број на преземени мерки во периодот од 19.06 (петок) до денес и за изминатото деноноќие.
Во таа насока, од страна на полициските службеници досега констатирани се вкупно 19709 прекршоци за неносење лична заштита на лицето, од кои 2169 во изминатиот викенд, а 705 прекршоци во изминатото деноноќие.
Во координација со Државниот пазарен инспекторат во текот на викендот извршени се 987 контроли при што се евидентирани 2 објекти кои не ги почитувале одлуките, од нив во изминатото деноноќие извршени се 212 контроли во објекти при што не се евидентирани објекти кои не ги почитувале одлуките на владата.
На територијата на целата држава за време на викендот издадени се вкупно 1145 решенија за изолација, а 738 лица потпишале изјави за самоизолација, од кои 566 решенија и 178 изјави во изминатото деноноќие. Од страна на полициските службеници извршени се контроли кај лица во изолација и самоизолација при што евидентирани се 16 лица кои не ги почитувале овие мерки, од кои 1 лице во изминатото деноноќие.
Во државен карантин се спроведени вкупно 398 лица за време на викендот, а 96 од нив се во изминатото деноноќие.
Во оваа прилика уште еднаш апелирам до сите граѓани да ги почитуваат мерките за заштита од коронавирусот и сите заеднички да придонесеме што побрзо животот да биде вратен во нормала.
