По повод веста за доаѓањето на Неговата Светост Папата Франциск во посета на Република Македонија, бискупот Киро Стојанов изрази голема радост и благодарност и ги повика сите верници католици и луѓе со добра волја во Република Македонија, како и од соседството, на молитва и духовна подготовка.
-Драги верници и почитувани граѓани на Република Македонија
Како бискуп, верник и граѓанин на оваа Земја – Република Македонија, веста за доаѓањето на Светиот Отец Папа Франциск во посета на нашата Земја ја примив со голема радост и благодарност кон Господа Бога, а верувам дека и граѓаните на Македонија и пред сѐ верниците католици ја примија со големо воодушевување. Сметам дека Светиот Отец Папа ја препозна потребата на Црквата и народ во Република Македонија за нивно охрабрување.
Папа Франциск од самиот почеток ја искажуваше и покажуваше својата близина и разбирање кон нас, примајќи ја секоја година во Аудиенција и Државната делгација во чест на чествувањето на Св. Кирил во Рим.
Верувам дека неговото доаѓање во главниот град на Државата и родниот град на св. Мајка Тереза – Скопје има посебна симболика, а исто така верувам дека и неговите пораки кои ќе бидат упатени за време на неговата посета ќе бидат делотворен поттик за многу потребната духовна и друга обнова на ова наше Општество и дека ќе ни помогне да го сфатиме и прифатиме фактот како сме сите, и како луѓе и како верници, одговорни за градење мир и среќна иднина меѓу сите верници, граѓани и народи во оваа наша мила Татковина – Македонија.
Затоа ги повикувам сите верници католици и луѓе со добра волја во Република Македонија, како и од соседството, на молитва и духовна подготовка за оваа драгоцена посета на Светиот Отец папа Франциск, првенецот на апостослкиот збор и неспорен морален авторитет на денешницата.
Логото за посетата на папата Франциск на Македонија содржи три главни елементи:
Првиот елемент е развиореното македонско знаме сместено во границите на Република Македонија. Земја која ја посетува Светиот Отец.
Вториот елемент е стилизираниот лик на папата Франциск, опточен со сини линии што симболизира дека Папата доаѓа во земјата на света Мајка Тереза. Ликот на папата Фрањо е претставен во полупрофил со десната рака ја благословува Македонија, со сите нејзини особености, а во левата рака го држи епископското жезло, што ја симболизира неговата пастирска посета на Македонија. Папата е во бело и во комбинација со жолтата боја од зраците на македонското знаме ги отсликува боите на ватиканското знаме.
Во долниот дел се бранови во сина боја, кои укажуваат на секојдневните предизивици, истакнувајќи го наследството кое света Мајка Тереза го остава на Македонија, градот Скопје и овие простори.
Мотото за посетата е земено од Евангелието според Лука 12,32 „Не бој се, мало стадо!
