Арсовски: Граѓаните тонат во сиромаштија, ама СДСМ не штеди на ПР услуги

Замислете, уште еден скандал со огромна сума на пари потрошени во корона пандемија, кој што јасно го отсликува лудилото на власта, рече на прес-конференција портпаролот на опозициската ВМРО-ДПМНЕ, Димче Арсовски.

– Имено, власта за само 2 години дала преку тендери над 300.000 евра на поранешен пратеник од нивен коалиционен партнер, а се работи за фирмите Имиџ ПР и Идеа плус, фирми кои се занимаваат со ПР и маркетинг, а се на една иста личност, односно поранешна пратеничка од редовите на ЛДП, вели Арсовски.

Според него лудило е да се даде над 300.000 евра за маркетинг и ПР за само 2 години, од кои огромен дел од парите се дадени само во 2020 година за организирање настани. Истакнува дека станува збор за година во која имаме пандемија.

– Очигледно на СДСМ и на власта најлесно им е да се испумпува пари преку маркетинг и ПР услуги, а само од тендерите на овие 2 фирми и тендерите на советникот од СДСМ од Град Скопје Бојан Ивановиќ Бригада Дизајн кој доби од фондот за иновации над половина милион евра одат на конто на овие фирми и никој не знае потоа дали и каде завршуваат. Власта на учениците не може да им набави лап топи и таблети, но затоа фирмите блиски до СДСМ на свое конто товараат народски кажано милиони евра, истакна Арсовски.

Тој заврши кажувајќи дека ова е начинот на работа на СДСМ, а граѓани кои што тонат во сиромаштија заради луксузот и грабежот на власта.