Утре попладне во неколку градови низ земјава ќе продолжат протестите против зголемувањето на цената на електричната енергија. Досега се најавени протести во Скопје, Тетово, Куманово, Гостивар, Кичево и Дебар.
Денеска Координативниот совет побара Регулаторната комисија за енергетика да ја повлече одлуката за зголемување на цената на струјата за 7,4% и таа да се намали за потрошувачите за 46%. Владата да го намали ДДВ-то за електрична енергија од 18% на 5%. Собранието треба да ја укине Регулаторната комисија, велат од советот, бидејќи ова тело, според нив, им служи само на корпорациите и разните бизнис-групи.
Собранието да создаде независно тело во служба на граѓаните кое ќе има мисија да го проверува квалитетот на услугите на енергетските компании. Да ги истражи и реши сите поплаки на граѓаните против овие и слични изнудувачки корпорации. Да ги укине каматните стапки за граѓаните и да ги заштити потрошувачите од шемите за каматни стапки што им се наплатуваат, порачаа од координативниот совет.
