Македонија се соочува со економски колапс, на бизнисот итно му е потребна голема помош

Кога станува збор за здравјето на граѓаните не смее да има никакви калкулации, политикантство или делување само заради задоволување на суета. Македонија се соочува со сериозна закана по здравјето на граѓаните, но и со економски колапс кој ќе биде со катастрофални последици по нашата држава, велат од опозициската ВМРО-ДПМНЕ.

Во утринското соопштение од партијате се вели дека состојбата е лоша, а тоа го посочи, како што велат и претседателот на државата кој самиот призна дека системот не може да издржи и дека ќе колабира.

-На бизнисот итно му е потребна инјекција, свежи пари и помош. Од брзината на имплементација на мерките зависи дали ќе се спречи економска катастрофа. Лавината на отпуштања од работа веќе започна во неколку градови, потенцираат од ВМРО-ДПМНЕ.

Од партијата предлагаат итно замрзнување на обврските на компаниите кон државата чија што работа е поврзана или е погодена со ситуацијата. Дополнително, предлагаат и итно замрзнување на обврските за компаниите кон банките и заемодавателите, најмалку за месец март а доколку е потребно и кризата продолжи, и за месец април.

-Владата мора да ја преземе обврската и да ги сторнира и плати каматите по однос на кредитите на компаниите за месец март, а доколку продолжи кризата и за месец април, велат од партијата.

ВМРО-ДПМНЕ предлага државата да ги плати трошоците за вработените во компаниите кои што се погодени во висина од 50% од вкупниот трошок за вработените, односно 50% од бруто плата.

-Мора да  се направи анализа на сето она што се случува во моментот, кои сектори и компании се погодени и на истите да им се исплати државна помош во форма на субвенции, додаваат од партијата нарекувајќи ги „смешни мерките и 5 милиони евра наменети за стопанството“, кои според партијата не решаваат ништо.