Занимливости

Зошто имињата на родителите на Богородица ги нема во Библијата?

Зошто имињата на родителите на Богородица ги нема во Библијата?
На 22 септември нашата црква го празнува денот на родителите на Марија, мајката на Исус. Дали ги знаете нивните имиња? Веројатно не. Нема да ги дознаете ни доколку сте ревносен читател на Библијата зашто таму тие не се споменуваат. Причината за тоа? Никој не ја знае. Како тогаш ги знаеме нивните имиња? Прашањето повторно не води кон Протевангелието на Јаков, братот на Исус, за кое, како што напишавме вчера, нема докази за автентичноста, односно нема докази дека навистина потекнува од перото на Јаков.
Јоаким, татко на Марија, бил богат човек. Многу богат. На Бога му принесувал двојни понуди. Велел: „Ова е за добробит на сиот народ и за мене, Господ да се смилува и да ми ги прости гревовите“.
Но, на еден празник, еден од свештениците му префрлил: „Не е законски да носиш дарови, бидејќи немаш пород“.
Тоа го вознемирило Јоаким и тој заминал во пустина. Си ветил дека 40 дена нема да јаде и да пие, додека Господ не ги слушне неговите молитви. Тие се сведувале на едно: тој и неговата сопруга, Ана, да имаат пород.
Тоа е почетокот на приказната која ќе доведе до раѓањето на мајката на Исус. Кога имала девет месеци, Ана ја ставила на нозе да види дали може да стои, а таа направила девет чекори и се вратила во скутот на мајка си.
Авторот на Протевангелието не пропушта да го наведе и моментот кога и се јавува ангелот за да и каже дека „Господ е со неа и дека ќе забремени“. Марија тогаш имала 16 години.