На снимките од протестите, кои се одржаа во повеќе од 80 градови, се гледа како полицијата повремено користи сила за да ги растера демонстрантите, ги тепа учесниците со палки и ги одвлекува од местото на протестот.
Властите одбиле да ги одобрат собирите и ги прогласиле за незаконски.
Организацијата за човекови права ОВД-Инфо која ги следи притворањата, соопшти дека полицијата во неделата во 33 градови привела 839 лица, вклучувајќи и некои од најблиските соработници на Навални.
Повеќето од притворените, 354 од нив, се во Санкт Петербург, каде што властите прво го одобриле собирот, но потоа се предомислиле.
Новинската агенција Интерфакс го цитираше министерот за внатрешни работи кој кажа дека во Санкт Петербург се приведени околу 100 лица, а во Москва „неколкумина“.
Препорачаната промена на возраста за пензионирање, која во моментов поминува во парламентот ја намали поддршката кон Путин за околу 15 процентни бодови и е најнепопуларна мерка од 2005 година.
Навални, на кому му е забрането да се појавува на државната телевизија и кој претходно оваа година не смееше да се кандидира на претседателските избори, се надева дека ќе го искористи бесот на јавноста поради пензиските реформи.
Тој планирал да го води протестот во неделата во Москва, но судот минатиот месец го осуди за кршење на законот за протести и го казни со затвор од 30 дена.
Навални вели дека тоа е направено со цел да се поткопаат протестите.
