Претседателот на Европскиот совет, Доналд Туск денеска изрази задоволство од договорот за пакетот нови имиња за главните позиции во европските институции и на фактот што никој не гласаше против.
Го имавме целиот пакет пред првата седница на Европскиот парламент. Пред пет години, за тоа ни беа потребни три месеци за да одлучиме и пак некои лидери беа против. Оваа година тоа траеше три дена и никој не беше против, рече Туск на прес-конференција по завршувањето на самитот кој беше посветен на распределбата на водечките должности во ЕУ.
Сите земји-членки гласаа за предложениот пакет освен Германија, бидејќи и требало договор во владејачката коалиција на ЦДУ и СПД. Туск додаде дека канцеларката Ангела Меркел “лично го поддржа целиот пакет”.
По тешки преговори меѓу лидерите на земјите-членки се согласија за пакетот нови лидери – новиот претседател на Европската Комисија, Урсула фон дер Лајен е од Германија, претседателот на Европскиот совет е белгискиот премиер Шарл Мишел, претседател на Европската централна банка е Французинката Кристин Лагард, и високиот претставник за надворешна и безбедносна политичар Шпанецот Јозеф Борел, рече Туск.
За претседател на Европскиот парламент е предложено во првите две и пол години да биде избран лидерот на бугарските социјалдемократи, Сергеј Станишев, а во вториот дел од мандатот , Германецот Манфред Вебер.
Избравме две жени и двајца мажи за четири клучни позиции. Совршен баланс помеѓу половите и јас сум многу среќен за тоа. Европа е конечно од женски род . Мислам дека вредеше да се чека на овој исход, рече Туск.
