Турскиот парламент во вторникот одобри распоредување војници за придружување на руските сили во набљудувањето во Нагорно Карабах, откако Ерменија и Азербејџан потпишаа договор за прекин на огнот со посредство на Русија.
Ова ќе им овозможи на турската војска да биде стационирана во центарот една година, како дел од договорот меѓу Анкара и Москва за следење на спроведувањето на примирјето, што Азербејџан го склучи по територијалните придобивки.
Приближно 2.000 руски мировници исто така ќе бидат распоредени во регионот, пренесува Ројтерс.
Во писмото до парламентот со кое се бара одобрување на мандатот, претседателот Таип Ердоган рече дека присуството на турски војници и „ако е потребен цивилен персонал од нашата земја, ќе има корист за мирот и просперитетот на луѓето од регионот и е неопходен за нашите национални интереси“.
Примирјето потпишано на 10 ноември ја запре воената акција во и околу Нагорно Карабах, меѓународно признато како дел од Азербејџан, но населено со етнички Ерменци, по најлошите борби во регионот од 90-тите години на минатиот век.
Турција ја обвини Ерменија за окупација на територијата на Азербејџан и вети солидарност со нејзините етнички, турски роднини во Азербејџан.
