Каталонскиот регионален лидер Квим Тора изјави дека протестите, на кои често доаѓа до судири со полицијата, нема да завршат сè додека шпанската Влада не се согласи да ги ислуша барањата на сепаратистите.
– Ако не седнеме да разговараме, тоа нема да запре – рече Тора.
Тој ова го изјави после една недела немири во Барселона и други градови во североисточниот регион на протестите кои почнаа по изрекувањето на затворските казни на девет сепаратистички лидери.
Тора го критикуваше шпанскиот премиер Педро Санчез што не се согласи да се сретне со него кога денеска ги посети повредените полицајци во Барселона.
–Шпанија мора да сфати дека ова „ги надминува рамките на Каталонија” и оти „никој не може да управува со Шпанија без да го слуша гласот на Каталонците” – истакна Тора.
Шпанскиот привремен премиер Педро Санчез денеска беше во посета на Барселона по повеќедневните протести во таа област, но одби да се сретне со лидерите кои се залагаат за независност на Каталонија. Тој го обвини Тора не ја исполнил својата должност да воспостави ред.
Санчез беше пречекан од стотици мирни демонстранти, кои ја пееја каталонската химна и истакнуваа транспаренти со кои го повикаа да „седне и да разговара” со регионалната влада.
Санчез во Барселона се сретна со безбедносните сили и полицајците кои беа повредени на протестите, како и со лекарите задолжени за нивно закрепнување.
Претходно денеска тој му упати писмо на Тора, во кое посочи дека тој не успеал да обезбеди складен соживот меѓу оние кои се „за” и „против” независност на Каталонија. Санчез во писмото оценува дека Тора им „свртел грб” на безбедносните сили и го повика да ги осуди немирите.
