Тајландскиот крал се ожени со заменик-командантката на единицата што е задолжена за неговата безбедност и ја прогласи за кралица, соопшти кралското семејство.
Оваа вест беше изненадување за јавноста, а беше објавена во пресрет на официјалната церемонија на крунисување, која ќе се одржи в сабота, пренесува Би-би-си.
Кралот Маха Ваџиралонгкорн (66) претходно беше женет трипати и има седум деца.
Кралот Ваџиралонгкорн одлучи да се ожени со генералката Сутида Ваџиралонгкорн На Ајудхиа и да ја прогласи за кралицата Сутида. Таа ќе има кралска титула и статус, како дел од кралското семејство, се вели во соопштението.
Кралицата Сутида и кралот Ваџиралонгкорн неколку години се во врска и често беа гледани заедно во јавноста, но досега тоа никогаш не беше официјално објавено.
На снимките од свадбата може да се видат и други членови на кралското семејство, како и церемонијата за време на која кралот посипува света вода на главата на својата сопруга.
Кралот во 2014 година ја назначи Сутида Тиџаи, поранешна стјуардеса Таџ ервејс, за заменик-командант на своето обезбедување. Таа во декември 2016 година беше назначена за генерал на армијата.
