Претставниците на европските земји, Кина и Русија, кои се уште се посветени на нуклеарниот договор за Иран денеска се сретнаа со иранските претставници во Виена во обид да најдат решение за опстанокот на договорот.
Американските медиуми наведуваат дека се разговарало за актуелните проблеми во рамки на договорот, откако официјален Техеран го надмина дозволеното количество збогатен ураниум што сам го произведува.
Иран неодамна ја мина границата за збогатување ураниум, нагласувајќи дека ќе престане да произведува недозволено количество доколку Германија, Франција, Британија, Кина, Русија и останатите членки на ЕУ на официјален Техеран му дадат економски поттик да се избори против американските санкции.
–Средбата во Виена овозможи разговори за ситуацијата по повод имплементацијата на спогодбата со акцент на неговите економски и нуклеарни компоненти. Јасно е дека американските санкции го поткопуваат овој договор, меѓутоа, сите учесници се цврсто посветени – изјави Михаил Уљанов, претставник на Русија во меѓународните организации, во Виена, пренесува Тасс.
Претседателот на САД, Доналд Трамп минатата година донесе еднострана одлука САД да ја напуштат спогодбата од 2015 година, за да може да постигне подобра.
