Белата куќа ги осуди иранските власти поради употреба на сила во дводневните демонстрации предизвикани од зголемувањето на цената на горивото. Во тие демонстрации загинаа најмалку две лица.
– САД ги поддржуваат Иранците и нивните мирни демонстрации против режимот што треба да владее со нив. Ја осудуваме употребата на сила против демонстрантите и рестрикцијата на комуникациите – изјави портпаролката на американската администрација Стефани Гришам.
Според иранските медиуми откако почнаа протестите уапсени се повеќе десетици луѓе.
Иранскиот врховен лидер, ајатолахот Али Хамнеи, ја поддржа одлуката на Владата, донесена во петокот, за зголемување на цената на горивото и го осуди насилството од страна на демонстрантите.
Според иранската новинска агенција ИРНА, еден полицаец им подлегнал на раните што ги здобил за време на судирите со демонстрантите во Керманшах, западен Иран. Еден демонстрант, пак, загинал во Сириџан, јужниот дел на земјата, кога учесниците во протестот се обидувале да запалат еден магацин со гориво.
