Човечки остатоци се пронајдени на длабочина од 23 метри во Јаванско море по падот на авионот на компанијата Сривиџаја на летот 182, соопштија индонезиските власти.
Патничкиот авион Боинг 737 се урна во морето кратко по полетувањето од главниот град на земјата Џакарта во саботата, со 62 патници и членови на екипажот.
-Сигурни сме дека нуркачите ја испитуваат локацијата каде авионот падна во морето, рече шефот на службата за цивилно воздухопловство, Хади Тиџханто, додавајќи дека се пронајдени скршени делови од авионот, посмртни останки и облека.
Пресвртна точка во потрагата по авионот на компанијата Сривиџаја на летот 182 беше кога сонар од воен брод откри сигнал од локаторот на авионот на место за кое претходно се сомневаше дека е местото на несреќата.
Сепак, сè уште не е познато ништо за причините за падот на авионот, а се претпоставува дека нема преживеани.
– Сакам да изразам длабоко сочувство во името на сите индонезиски граѓани за оваа трагедија. Се молиме да најдеме некој што преживеал, рече претседателот на Индонезија, Џоко Видодо.
Несреќата најпрво ја пријавиле рибари кои ловеле во водите на Јаванско море и кои вчера околу 14,30 часот најпрво ја слушнале експлозијата, а потоа виделе голема воден столб и бран како се движат кон нив.
Властите веднаш отворија два кризни центри, еден на аеродромот во Џакарта и еден во пристаништето, а претседателот на авиокомпанијата Сривиџаја изјави дека авионот, стар 26 години, бил технички исправен и дека летот доцнел поради лошите временски услови, а не поради проблеми со исправноста на леталото.
