Обвинителството во Боливија соопшти дека е извршен претрес во домот на соборениот претседател Ево Моралес како дел од истрагата за тероризам и противдржавна дејност што се води против поранешниот лидер на земјата кој е во егзил.
Моралес минатиот месец поднесе оставка по речиси 14 години на власт по барање на боливиската војска. Оттогаш тој се наоѓа во Мексико, каде доби азил како жртва на преврат.
Неговата наследничка Жанин Ањез го обвини Моралес и други негови соработници за разгорување на жестоки судири по изборите во Боливија, кои траеја повеќе од еден месец и во нив загинаа десетици луѓе.
Обвинителот Руди Теразас изјави дека претресот во домот на Моралес во Ахумани, богат кварт во административната престолнина Ла Паз, е извршен по судски налог. Компјутерите, пронајдени во имотот, ќе бидат прегледани поради докази за „тероризам и дејствија против државата“.
Моралес на Твитер напиша дека истражните органи ја злоупотребиле својата должност.
Sigue la persecución política: las semanas pasadas asaltan mi casa en #Cochabamba, roban y queman mis pertenencias. pic.twitter.com/HohP3nsx6p
— Evo Morales Ayma (@evoespueblo) December 11, 2019
Сегашната власт тврди дека Моралес предизвикал голем недостиг на храна и гориво, давајќи им инструкции на своите следбеници да ги блокираат патиштата кои водат кон големите градови, по неговото заминување во Мексико.
