Во својата новогодшна порака, германската канцеларка Ангела Меркел соопшти дека со сета сила се бори против климатските промени за да им овозможи на идните генерации да живеат во мир и просперитет.
– Глобалното загревање е реално. Тоа е закана – изјави Меркел во снимениот говор што ќе биде емитуван вечерва.
Меркел додаде дека растот на светските температури и проблемите предизвикани од глобалното затоплување ги создале луѓето.
– Значи, мораме да направиме се што е во човековата моќ за да го надминеме овој човечки предизвик. Тоа е се уште можно. Имам 65 години и сум во возраст во која јас лично веќе нема да ги доживувам сите последици на климатските промени што ќе се случат доколку политичарите не преземат нешто. Нашите деца и внуци мора да живеат со последиците на тоа што го правиме или не правиме денеска. Затоа ја користам сета сила Германија да го обезбеди својот придонес – еколошки, економски, општествен – климатските промени да се доведат под контрола – истакна Меркел.
Канцеларката ги повика Германците да размислат како да се носат со предизвиците што произлегуваат од глобалното затоплување.
– За тоа да се постигне, потребна ни е храброст да размислуваме на нов начин од било кога претходно, сила да се напуштат познатите патишта, подготвеност за испробување на нови нешта и одлучност делата да се забразаат, уверени дека необичното може да успее – и мора да успее доколку сакаме генерациите на денешните млади луѓе и нивните потомци и натаму да бидат во состојба да живеат добро на Земјата – заклучи Меркел.
