Се уште официјалниот претседател на Венецуела Николас Мадуро ги обвини САД за обид за државен удар во таа земја, пренесуваат агенциите.
Тој предупреди дека Каракас ги прекинува дипломатските односи со Вашингтон, им нареди на американските дипломати да ја напуштат Венецуела, а на претседателот Доналд Трамп му се обрати на англиски јазик: „рацете подалеку од Венецуела“.
Мадуро одржа говор пред венецуелските дипломати кои неодамна се вратија од Соединетите држави.
Иако зборуваше на шпански, една реченица кажа и на англиски јазик, за американскиот колега да може да го разбере.
-Трамп, ти си одговорен за кое било насилство кое може да се случи во Венецуела, тоа е твоја одговорност. Крвта која би можела да биде пролеана во Венецуела е на твоите раце, претседателе Трамп, порача Мадуро.
Тој го нарече Хуан Гуаидо, кој се прогласи за привремен претседател на Венецуела, „американска марионета“.
