Куба ја осуди администрацијата на Доналд Трамп поради нејзината „ароганција и гнилост“, по повод одлуката да не му дозволи на Раул Кастро да отпатува во Соединетите Држави.
Ова е потег што нема никаков практичен ефект, а целта му е навреда на достоинството на Куба и на чувствата на нашиот народ, рече министерот за надворешни работи Бруно Родригез Париља на собирот на светските лидери во Обединетите нации, објави АП.
–Тоа е трошката што ги привлекува гласовите на кубанско-американската крајна десница – рече тој.
Соединетите Држави во четвртокот воведоа санкции врз поранешниот кубански претседател Раул Кастро и неговите деца, како нов притисок врз Куба поради поддршката на претседателот на Венецуела, Николас Мадуро.
–Како прв секретар на Кубанските вооружени сили, Кастро е одговорен за поддршката на таа земја до режимот на поранешниот претседател на Венецуела Мадуро преку насилство, заплашување и репресија – се вели во изјавата на американскиот државен секретар Мајк Помпео, каде што се повторува ставот на Вашингтон дека Мадуро не е легитимен претседател на Венецуела.
Помпео тврди дека кубанските безбедносни сили, во консултација со воените и разузнавачките служби на Мадуро, биле вмешани во тешки прекршувања и злоупотреби на човековите права, вклучително и тортура, објави Ројтерс.
Раул Кастро се повлече од функцијата шеф на државата, но сè уште ја предводи владејачката Кубанска комунистичка партија.
