Најмалку 56 земји и територии низ целиот свет одлучија да ги одложат парламентарните и локални избори заради Ковид-19 и заштита на нивните граѓани.
Избори се откажани на речиси сите континенти, покажува „Глобалниот преглед на Ковид-19: Влијание врз изборите“, од каде може да се види дека откажани избори се во Африка, Америка, Азија и Европа. Откажани се и локалните избори во Австрија. Избори откажаа и Чешката Република, Англија и Германија. За потсетување првиот круг од локалните избори во Франција во март годинава предизвика рекордно ниско ниво на излезеност со што вториот круг беше одложен и се уште не е одржан.
-Високата стапка на воздржаност е доказ дека граѓаните се плашат да излезат на гласање, неодамна изјави премиерот на Франција Едуард Филип.
Сепак, според податоците на сајтот, има најмалку 23 земји и територии кои одлучиче да одржат парламентарни или локални избори и покрај загриженоста поврзана со Ковид-19, од кои најмалку 9 земји веќе ги спровеле изборите. Во периодот март и април, во време на корона-криза, избори одржале: Иран, Гвајана, Доминиканската Република, Вануату, Камерун, Мали, а претседателски во Тајван. Додека во месец мај единствено локални избори се одржани во Бенин, Западна Африка.
Избори во месец јуни и покрај корона-кризата, наведува сајтот, се предвидува да се одржат во Исланд на 27 јуни, Монголија 24 јуни, а Малави ќе одржи прегласување на претседателските избори на 2 јуни.
Изборите ги одложија за крајот на летото: Нов Зеланд – општи избори и референдум ќе се одржи на 19 септември. Јордан парламентарни избори ќе одржи во септември, а Литванија во октомври. Изборите во Белорусија остануваат на распоредот за 9 август 2020 година. Локалните избори во Босна и Херцеговина се потврдени дека ќе се случуваат на 4 октомври. Покрај ова, претседателските избори за САД се уште се закажани за 3 ноември 2020 година. Сингапур, Либерија и Бразил размислуваат за одложување на изборите во октомври 2020 година. И Полска ги откажа претседателските избори поради пандемијата со корона вирусот. Истите требаше да бидат одржани во неделата, но беа одложени, а новиот датум ќе се дознае за две недели.
Сепак, некои земји разговараат и за можноста за одржување избори и покрај ризикот што го предизвикува пандемијата, како што е Танзанија. Хрватска размислува да спроведе избори во јуни или јули, наместо првичниот датум утврден за доцна есен. Србија доколку пандемијата со Ковид-19 биде по контрола планира изборите да ги одржи на 21 јуни, изјави вчера претседателот на државата, Александар Вучиќ.
Инаку во регионот избори до овој момент беа одложени и во Црна Гора, Косово и Србија, вклучувајќи ја и Македонија.
