Лидерите на ривалските партии во Ирска, „Фијана Фол“ и „Фине Геил“, првпат во историјата постигнаа договор заедно да владеат со земјата доколку добијат дополнителна поддршка за формирање коалиција. Овој договор доаѓа два месеци по изборите кои ги засени пандемијата на Ковид-19.
Лидерот на „Фијана Фол“, Мајкл Мартин и премиерот Лео Варадкар од „Фине Геил“ го потпишаа договорот што го договорија нивните преговарачки тимови во понеделникот, објавија локалните медиуми.
Овие две партии на десниот центар се менуваат на власт уште од граѓанската војна во 20-тите години на минатиот век, но никогаш заедно не формирале коалиција.
На ривалските партии им треба поддршка од најмалку една партија или осум независни пратеници за да имаат мнозинство во Парламентот со 160 места.
