Германскиот министер за здравство, Јенс Шпан, изрази надеж дека наскоро ќе може да се користат лекови со насочено дејство за лекување на вирусот Ковид-19, бидејќи е убеден дека лекот ќе се појави на пазарот пред вакцината.
– Постојат први индикации дека некои лекови, се чини дека помагаат. Студиите треба да се спроведат што е можно поскоро – вели Шпан за весникот „Билд“.
Сепак, тој смета дека мора да се внимава затоа што пациентите мора да бидат заштитени, затоа што секој лек има и несакани ефекти.
Шпан потенцира дека во Германија веќе се направени повеќе студии, меѓу кои и за „стариот“ лек против маларија „Ресохин“ на фармацевскиот гигант „Баер“.
– Развојот на вакцина носи поголем предизвик. За лекот против маларија знаеме со години, децении. Го знаеме дејството и нус појавите. Сега тоа мора да биде анализирано и за лекување на Ковид-19 – потенцира Шпан.
Кога станува збор за производство на вакцина, Шпан вели дека станува збор за повеќе месеци, а не само неколку.
– Би бил најсреќен министер за здравство во светот доколку за три до шест месеци имаме вакцина. Но, јас сум реалист и доволно ме советуваа експертите за да знам дека тоа може да трае и 12 месеци. Поради тоа, во политиката не смееме да будиме лажни надежи – нагласува Шпан.
